Foreldur, sum missa eitt barna, skulu kunna fara í sorgarfarloysi í eina tíð. Tað tekur ein stórur meiriluti av flokkunum á Løgtingi undir við.
Djóni Nolsøe Joensen, tingmaður fyri Javnaðarflokkin, hevur reist málið í Løgtinginum, og nú Vinnunevndin hjá Løgtinginum hevur viðgjørt tað, vísir tað seg, at tey eru øll samd um, at hetta er eitt gott uppskot, sum eigur at verða sett í verk.
Les meiri her: Foreldur sum missa eitt barn skulu fáa farloyvi
Løgtingsmaðurin sigur, at tá ið foreldur verða rakt av tí vanlagnu, tað er at missa eitt barn, eru tað summi foreldur, sum hava brúk fyri at verða heima í eina tíð og syrgja, tí tí heldur hann, at vit eiga at fáa eina skipan við sorgarfarloyvi, so at tey fáa ráð til at verða heima.
Fimm flokkar eru umboðaðir í Vinnunevndini, Fólkaflokkurin, Sambandsflokkurin, Javnaðarflokkurin, Tjóðveldi og Framsókn og umboðini fyri teir flokkarnir eru samdir um at mæla Løgtinginum til at samtykkja uppskotið og at heita á Landsstýrið um at seta eina slíka skipan í verk.
Annars er hetta ikki eitt mál, Landsstýrið hevur arbeitt við, hevur landsstýrismaðurin á økinum, Helgi Abrahamsen, upplýst fyri Løgtinginum.
Les meiri her: Foreldur sum missa eitt barn sleppa ikki í farloyvi at syrgja
Djóni Nolsøe Joensen hevur skotið upp, at foreldur, sum missa eitt barn undir 18 ár, skulu kunna fara í sorgarfarloyvi og fáa stuðul úr barsilsskipanini fyri at leggja upp fyri tí fíggjarliga missinum, tey annars høvdu fingið av hesum.
Men tey í Vinnunevndini halda, at tá ið landsstýrið setir eina slíka skipan í verk, eiga tey at umhugsa at strika aldursmarkið, tí tað at missa eitt barn er líka svárt og lemjandi um barnið so er yvir 18 ár.
Men tey halda ikki at tað er rætt at knýta barsilsskipanina upp í hetta málið. Tey halda, at fíggjarligi stuðulin skal vera úr dagpeningaskipanini.
