Hizbollah-álopið var vent móti eini hernaðarstøð nærindis býnum, Binyamina í norðara parti av Ísrael.
Útlendskir miðlar vita at siga, at 61 herfólk vórðu særd í álopinum, harav fýra 19 ára gamlir hermenn lótu lív.
Sambært ísraelsku sjúkraflutningstænastuni fingu trý herfólk aftrat so álvarsligar løstir, at lívið er í vanda.
Ísraelski herurin (IDF) hevur sagt, at 58 fingu skaða, harav sjey fingu álvarslig mein.
Ógreitt er, hví ósamsvar er í tølunum hjá IDF og ísraelsku sjúkraflutningstænastuni.
Hizbollah hevur váttað, at felagsskapurin stóð aftan fyri álopið, sum er eitt av teimum størstu móti ísraelskum støðum seinasta árið.