Libyska stjórnin vísir aftur øllum tosi um, at Muammar Gaddafi skal leggja frá sær. Tað fekk russiski sendimaðurin Mikhail Margelov at vita, tá hann hitti libyska forsætisráðharran, Baghdadi al-Mahmudi, í dag.
Russiski sendimaðurin sigur, at hann fekk at vita, at stjórnin í Tripoli hevur tingast við leiðsluna hjá uppreistrarmonnunum.
-Al-Mahmudi segði mær, at fundirnir hava verið í París, og at teir endaðu í gjár, sigur Margelov við russisku tíðindastovuna Itar-Tass. Sambært sendimanninum var franski forsetin, Nicolas Sarkozy, vitandi um tingingarnar og úrslitið av teimum.
-Hetta merkir, at partarnir tosa saman, ella tað er í hvussu er tann uppfatanin, sum stjórnin í Tripoli hevur, sigur russiski sendimaðurin
við Itar-Tass. Hann hitti ikki Muammar Gaddafi.
