Grannar á støðutalvuni hittast í dag

So er 23. umfar í betu fótbóltsdeildini á skrá. Fýra dystir vera seinnapartin í dag, og ein verður í annaðkvøld, tá ið tað verður grannauppgerð í Gundadali.

Burtursæð frá dystinum í Trongisvági so er hetta umfarið eyðkent av, at feløgini, sum hittast, eru lið um lið á støðutalvuni.

Í Fløtugerði í Fuglafirði verður AB seinnapartin í dag gestur hjá ÍF. Fuglfirðingar eru niðast á støðutalvuni, og argjamenn eru næstaftast. Talan er tí um sanna lyklauppgerð í kappingini um at sleppa undan at flyta niður.

Toppliðið KÍ lendi í Vágum seinnapartin fríggjadagin eftir Europa Conference League ferðina í Slovakia, har KÍ hóskvøldið tapti 2-1. Seinnapartin í gjár fór KÍ aftur at ferðast. Tá gekk leiðin við Smyrli suður á Krambatanga, tí KÍ seinnapartin í dag í Trongisvági fer at kappast fyri at halda tørn um oddasessin, meðan setningurin hjá TB er at betra um støðuna í botnstríðnum.

Víkingur, sum er á fjórða plássi, fær vitjan av 07 Vestur, sum er á fimta plássi, og B68 fær vitjan av EB/Streymi, sum eru á ávikavíst sjeynda og sætta plássi.

Tað kemur ikki so ofta fyri, at eingin dystur sunnudagar er í høvuðsstaðnum, men soleiðis er tað í dag. Grannadysturin millum B36 og HB verður mánakvøldið.

Veðurforsøgnin sigur, at tað seinnapartin verður eitt fitt lágættarlot, og tað framvegis fer at regna.

Í dag

ÍF – AB: Jóhan Hendrik Ellefsen kl. 14.00

Víkingur – 07 Vestur: Rúni Gaardbo kl. 15.00

B68 – EB/Streymur: Rúni Olsen kl. 15.00

TB – KÍ: Alex Troleis kl. 15.00

Mánadagin

B36 – HB: Bjarki Danielsen kl. 18.00