Danir og grønlendingar skulu hava sama rætt at keypa sær hús og jørð í Føroyum, sum føroyingar hava. Tað heldur samgongan.

Løgtingið viðger eitt uppskot frá løgmanni um at avmarka møguleikarnar hjá útlendingum at keypa sær fasta ogn í Føroyum. Nú hevur málið verið til viðgerar í Rættarnevndini hjá Løgtinginum og har taka umboðini fyri samgonguna undir við tí.

Meirilutin í Rættarnevndini, sum eru Christian Andreasen, Frimodt Rasmussen, Helgi Abrahamsen og Steffan Klein Poulsen halda, at tað er tørvur á reglum fyri, nær útlendingar kunnu útvega sær fasta ogn í Føroyum – serliga tí Føroyar eru so lítlar.

Tey hava eisini fingið at vita frá meklarum, at enn er tað ikki ein trupulleiki, at útlendingar keypa hús og jørð í Føroyum, men at áhugin er veksandi. Føroyar eru við at gerast eitt kent ferðavinnumál, og Føroyar fáa eisini í aðrar mátar rættuliga nógva umrøðu í útheiminum, so eisini av hesum orsøkum kann áhugin hjá útlendingum at keypa fasta ogn í Føroyum gerast størri enn higartil, siga umboðini fyri samgonguna.

Men tey siga eisini, at eftir galdandi reglum ber ikki til at gera mun á føroyingum og øðrum donskum ríkisborgarum.

Eftir uppskotinum hjá løgmanni skuldu fólk havt búð í Føroyum í minst fimm ár í lívinum fyri at kunna keypa fasta ogn her. Men umboðini fyri samgonguna í Rættarnevndini vilja hava Løgtingið at gera treytirnar linari. Tey siga nevniliga, at eisini tey, sum hava búð í Grønlandi, ella í Danmark í tilsamans fimm ár av teirra lívi, kunnu keypa hús og jørð í Føroyum. Men treytin er kortini, at tey eru danskir ríkisborgarar.

Treytirnar fyri at kunna keypa fastogn í Føroyum ,uttan loyvi frá landsstýrismanninum, verða sostatt:

– at viðkomandi hevur fastan bústað í Føroyum, ella

– at viðkomandi hevur áður búð í Føroyum í samanlagt 5 ár, ella

–at viðkomandi hevur búð í øðrum pørti av ríkinum í samanlagt 5 ár og hevur danskan ríkisborgaraskap.

Feløg, sum keypa fasta ogn í Føroyum, skulu hava høvuðsæti í Føroyum.