Ikki fyrrenn í 18. umfari tapti liðið Mikkjal Thomassen, Fredrikstad fyrsta dystin í næstbestu norsku fótbóltsdeildini.
Fredrikstad tapti oddauppgerðini á útivølli 1-2 fyri Oslo KFUM.
Jóannes Bjartalíð var liðskipari hjá Fredrikstad í dag. Jóannes legði upp til málið tá Riki Alba í 17. minutti legði Fredrikstad á odda 1-0.
Fýra minuttir undan steðginum javnaði Oslo til 1-1. Oslo skoraði sigursmálið tá 59 minuttir vóru spældir av dystinum. Stutt aftaná kom Brandur H. Olsen á vøllin, men Brandur, Jóannes og liðfelagarnir megnaðu ikki at fáa stig hesaferð.
Oslo var vandamiklari og hevði fleiri royndir á málið hjá Fredrikstad enn gestirnir.
Gullbrandur Øregaard spældi allan dystin, tá hann og liðfelagarnir í Sandnes ULF vunnu ein týdningarmiklan 2-0 sigur á Moss.
Tommy Høiland legði Sandnes á odda 10 minuttir undan steðginum. Sami Tommy Høiland staðfesti sigurin tá 12 minuttir vóru eftir av vanligu leiktíðini.
Noah Mneney kom á vøllin í 84. minutti, tá hann og liðfelagarnir á heimavølli vunnu 2-1 (1-0) á Hødd.
Fredrikstad er nummar tvey í deildini við 35 stigum, tvey stig aftanfyri Kongsvinger og eitt stig frammanfyri Oslo KFUM.
Bryne er nummar 11 í deildini við 22 stigum og Sandnes er nummar 13 við 20 stigum.
