Hallur Hansson var við frá byrjan, tá AaB í kvøld tapti 4-0 fyri FCK í Parkini. Hetta er fyrstu ferð, at hann spælir við frá byrjan.
FCK byrjaði við fullari ferð, og kom á odda longu aftaná sjey minuttir, tá Nicolai Jørgensen skoraði. Stutt seinni økti sami maður eftir horna. Áðrenn farið varð til hálvleiks høvdu Kenneth Emil Petersen og Cesar Santin økti til 4-0.
Føroyski landsliðsmiðvallarin spældi á verjukenda miðvøllinum, men eins og restin av AaB liðnum, so gekk minni væl. FCK vóru vandamiklir at kalla hvørja ferð teir royndu seg móti málinum líkamikið um talan var um deyðbóltsstøður ella úr opnum spæli.
Í seinna hálvleiki kom AaB betri við, meðan FCK helst tók sær av løttum. Tíggju minuttir fyri tíð vísti TV3plus ein lista yvir teir, ið høvdu runnið mest á vøllinum. Hallur Hansson hevði runnið fjórð mest av øllum, so orkini bilar einki.
FCK er oddalið, meðan AaB ligur nummar trý í Superliguni.
