Sum støðan er nú, stemdir Kamala Harris at vinna á Donald Trump við tveimum prosentstigum á amerikanska forsetavalinum.
Tað vísir ein meiningakanning, sum tíðindastovan Reuters og greiningarstovnurin Ipsos hava gjørt.
1241 amerikanarar hava luttikið í kanningini. 1081 av teimum eru skrásettir veljarar.
Úrslitið av kanningini vísir, at 44 prosent stuðla Harris sum næsta forseta í USA, meðan 42 prosent taka undir við Trump.
Talan er sostatt um eina sera smala leiðslu, og Reuters skrivar eisini, at mátingin hevur eina hagtalsliga óvissu uppá trý prosentstig.
Sambært Reuters halda 56 prosent av skrásettu veljarunum, at 59 ára gamla Harris er "mentalt hvøss og dugir at handfara avbjóðingar." 49 prosent av teimum halda tað sama um Trump, sum er 78 ára gamal.
Samstundis halda 22 prosent, at núverandi forsetin í USA, 81 ára gamli Joe Biden, er "mentalt hvassur og dugir at handfara avbjóðingar".
Biden tók seg úr valstríðnum um vikuskiftið eftir vaksandi trýst frá einum stórum tali av flokslimum, sum hildu, at hann ikki longur kundi vinna á forsetavalinum.
Serstaka valskipanin í USA ger, at tað ikki neyðturviliga er forsetavalevnið, sum fær flestar atkvøður, sum verður forseti.
Tað valevnið, sum fær flestar atkvøður í valdøminum, vinnur valið.
Í USA eru 538 valmenn býttir millum teir 50 statirnar og Washington D.C. Neyðugt er við í minsta lagi 270 valmonnum fyri at gerast forseti.
Tann 15. juli varð Trump alment uppstillaður sum forsetavalevni hjá republikanska partinum.
Harris er enn ikki alment útnevnd sum valevni hjá demokratunum.
Sambært ónevndum keldum frá hennara valstríðsfólkum hevur hon tryggjað sær stuðul frá nóg nógvum umboðum til at gerast forsetavalevni hjá flokkinum. Hetta skrivar Reuters.
Amerikanska forsetavalið verður týsdagin 5. november.
/ritzau/
