Tríggir EM-undankappingarbólkar afturat eru nú liðugt spældir, og tvey lið hava í kvøld spælt seg beinleiðis víðari. Tey eru Slovakia, sum vann 4-2 ímóti Luksemburg og harvið yvirhálaði Ukreina, sum tapti ímóti Spania, og Russland, sum fyrr í dag tryggjaði sær 2. plássið við 2-0-sigri ímóti Makedonia.
England hevur leingi verið trygt víðari til EM-endaspælið, og í kvøld fullførdu teir eina ótrúliga undankapping, har teir hava vunnið allar tíggju dystirnar í bólkinum. Eitt skert enskt lið vann í kvøld 3-0 ímóti Litava. Ross Barkley, Alex Oxlade-Chamberlain og eitt sjálvmál vóru á máltalvuni.
Higartil er Ísland einasta norðurlendska landið, sum hevur spælt seg víðari. Svøríki og Danmark skulu spæla playoffs, men í morgin kann Noreg spæla seg víðari. Teir eru í løtuni á 2. plássi tvey stig frammanfyri Kroatia. Tað kann tó broytast, tí í morgin skal Noreg á vitjan hjá Italia, meðan Kroatia skal á vitjan hjá Malta.
Londini, sum higartil hava tryggjað sær luttøku til EM-endaspælið í Fraklandi næsta summar, eru hesi:
Frakland
Ísland
Kekkia
England
Eysturríki
Spania
Sveis
Italia
Wales
Belgia
Portugal
Albania
Týskland
Pólland
Norðurírland
Rumenia
Russland
Slovakia
