Ein iransk ST-sendinevnd segði í dag, at tað var libanesiski Hizbollah-felagsskapurin sum stóð aftanfyri álopið á bústaðin hjá ísraelska forsætisráðharranum, Benjamin Netanyahu.
– Atgerðin varð framd av Hizbollah í Libanon, upplýsti sendinevndin, tá hon svaraði spurninginum um leiklutin hjá Iran í álopinum.
Tað er iranska tíðindastovan Irna, sum ber hesi tíðindi.
Fyrr í dag legði Benjamin Netanyahu Hizbollah undir at hava roynt at beina fyri honum og konuni, og hann lovaði hevnd yvir Iran og allar sameindu hjá landinum.
- Tit fara at gjalda ein høgan prís, legði ísraelski forsætisráðharrin aftrat.
Hizbollah, sum eru sameindir hjá Iran, hevur enn ikki tikið ábyrgd av álopinum, veit tíðindastovan NTB at siga í kvøld.
Talan var um eina dronu, sum varð skotin móti privata heiminum hjá ísraelska forsætisráðharranum í býnum Kesarea har norðuri í Ísrael.
Sambært útlendskum miðlum er hetta summarbústaðurin hjá Benjamin Netanyahu. Eingin fekk skaða, og forsætisáðharrin var ikki heima.