Fyrstu dystirnir í fyrsta umfari í HM 2022-undankappingini í Evropa hava verið í kvøld. Holland bleiv avsmurt í Turkalandi, Frakland fekk bara javnleik á heimavølli og Portugal mátti hava hjálp at vinna á Aserbadjan.
Bólkur A:
Tað skuldi eitt sjálvmál til, áðrenn Portugal megnaði at vinna á Aserbadjan. Nógv er gjørt burturúr, at Portugal er við at raka ein gyltan árgang, men tað kom ikki heilt til sjóndar í kvøld. Tað skuldi eitt sjálvmál frá Maksim Medvedev til, áðrenn dysturin koppaði. Portugal var tó greitt omaná við 15 skotum á mál, meðan gestirnir einki høvdu.
Í Beograd vann Serbia 3-2 á Írlandi. Dusan Tadic legði upp til øll trý málini hjá vertunum. Alexandar Mitrovic skoraði tvey av teimum. Fimta liðið í bólkinum er Luksemborg, ið situr yvir í dag.
Støðan:
1. Serbia 3 stig
2. Portugal 3
3. Luksemborg 0
4. Írland 0
5. Aserbadjan 0
Bólkur D:
Frakland er heimsmeistari og liðið er fult av stórum stjørnum, men í kvøld spældi ikki so væl av móti Ukraina, sjálvt um Antoine Griezmann legði vertirnar á odda longu aftaná 19 minuttir. Í seinna hálvleiki javnaði Ukraina, tá Presnel Kimpembe avrættaði bóltin í egið mál. Finnland og Bosnia Hersigovina spældu javnleik 2-2. Teemu Pukki skoraði bæði málini fyri vertirnar úr Finnlandi. Fimta liðið í bólkinum er Kasakhstan, sum situr yvir í kvøld.
Støðan:
1. Bosnia Hersigovina 1
2. Frakland 1
3. Ukraina 1
4. Frakland 1
5. Kasakhstan 0
Bólkur E:
Í bólki E komu tveir favoritt sigrar. Belgia vann 3-1 á Wales, og Kekkia vann heili 6-2 á útivølli móti Estlandi. Millum málskjúttarnar hjá Belgia vóru kendir menn sum Kevin De Bruyne og Romelu Lukaku. Fyri Kekkia skoraði West Ham stjørnan, Tomas Soucek, hattrik.
Støðan:
1. Kekkia 3
2. Belgia 3
3. Hvítarussland 0
4. Wales 0
5. Estland 0
Bólkur G:
Dagsins størsti skelkur kom í bólki G, har Turkaland vann 4-2 á Hollandi. Burak Yilmaz skoraði hattrik og tað var 3-0, áðrenn Holland kom inn aftur í dystin. Tað tók ein hálvan tíma hjá Norra at fáa hol á móti Gibraltar á útivølli. Norra vann 3-0, men tað telur niður at Martin Ødegaard mátti av vøllinum í hálvleikinum. Montenegro vann 2-1 á Lettlandi, sum annars kom á odda. Hetjan hjá Montenegro var stóra stjørnan, Stevan Jovetic, ið skoraði bæði málini.
Støðan:
1. Turkaland 3
2. Norra 3
3. Montenegro 3
4. Lettland 0
5. Holland 0
6. Gibraltar 0
Bólkur H:
Sæð við føroyskum eygum er tað nokk mest spennandi, at fylgja Malta, sum vit hava spælt móti fleiri ferðir seinnu árini. Teir taptu 3-1 á heimavølli móti Russlandi, men tað var ikki fyrr enn í seinasta minuttinum, at sigurin bleiv staðfestur. Slovenia vann 1-0 á Kroatia í eini spennandi grannauppgerð, har gestirnir vóru favorittar. Á Kýpros endaði tað málleyst móti Slovakia.
Støðan:
1. Russland 3
2. Slovenia 3
3. Kýpros 1
4. Slovakia 1
5. Kroatia 0
6. Malta 0
