Málsetningurin hjá Íslandi í Arena Zagreb í HM-millumbólki 4 í kvøld í dystinum móti Kroatia var greiður. Um liðið ikki fekk stig, so mátti teir, ið hvussu er syrgja fyri ikki at tapa við meira enn trimum málum. Tað kiksaði.
Kroatia við íslendska venjaranum, Degi Sigurðssyni vann greiðan 32-26 sigur á Íslandi. Í fyrra hálvleiki gekk av skriðuni hjá íslendingum, og í steðginum var Kroatia á odda heili 20-12.
Dominik Kuzmanovic í kroatiska málinum var ein sonn marra fyri íslendingar. Hann hevði heilar 17 bjargingar, meðan íslendsku málverjarnir høvdu 13 bjargingar.
Kroatia hevur tapt 24-28 fyri Egyptalandi, men vunnið 32-26 á Íslandi. Ísland vann 27-24 á Egyptalandi. Tí hevur Kroatia pluss tvey mál í innanhýsis roknskapinum. Egyptaland hevur pluss eitt mál, meðan Ísland hevur minus trý mál. Øll liðini hava seks stig, og tey hava sannlíkt øll átta stig aftaná dystirnar í seinasta umfarinum, ið verður leikt sunnudagin.
Tað hjálpti ikki upp á støðuna hjá Íslandi, at Egyptaland fyrr í kvøld vann tepran 26-25 (16-14) sigur á Slovenia. Hevði Slovenia knógvað ein javnleik hevði staðið væl til hjá Íslandi.
Ísland má vinna á Argentina sunnudagin, og so vóna, at Slovenia fremur eitt roysnið móti Kroatia. Kap Verde ger einki við Egyptaland.
Í sama bólki vann Argentina botnfinaluna móti Kap Verde við úrslitinum 30-26 (14-14).
Kroatia, Egyptaland og Ísland hava øll seks stig. Slovenia hevur fýra stig, Argentina hevur tvey stig, og Kap Verde er aftast við ongum stigi.
Kroatia-Ísland 32-26 (20-12)
Toppskjúttar Kroatia: Ivan Martinovic 8, Mateo Maras 5, Zvonimir Srna 5, Mario Sostaric 4.
Toppskjúttar Ísland: Viggó Kristjánsson 5, Orri Freyr Þorkelsson 4, Aron Pálmarsson 4.
Egyptaland-Slovenia 26-25 (16-14)
Toppskjúttar Egyptaland: Seif Elderaa 6, Ahmed Adel 5, Yahia Omar 5.
Toppskjúttar Slovenia: Blaz Janc 8, Aleks Vlah 7, Miha Kavcic 3, Stas Slatinek Jovicic 3.
Kap Verde-Argentina 26-30 (14-14)
Toppskjúttar Kap Verde: Délcio Pina 10, Gualther Furtado 4, Bruno Landim 3, Paulo Moreno 3, Admilson Estaliny Furtado 3.
Toppskjúttar Argentina: Nicolas Jung 5, Facundo Cangiani 5, Juan Saco 5, Pedro Martínez 4, Nicolás Bono 4.
Skráin:
22. januar: Slovenia-Argentina 23-34 (8-15)
22. januar: Kap Verde-Kroatia 24-44 (11-24)
22. januar: Egyptaland-Ísland 24-27 (9-13)
24. januar: Egyptaland-Slovenia 26-25 (16-14)
24. januar: Kap Verde-Argentina 26-30 (14-14)
24. januar: Kroatia-Ísland 32-26 (20-12)
26. januar: Ísland-Argentina (klokkan 17)
26. januar: Kap Verde-Egyptaland (klokkan 17)
26. januar: Kroatia-Slovenia (klokkan 19.30)
