Í kvøld veit tíðindastovan NTB at siga, at í minsta lagi 100 námsarbeiðarar eru deyðir í Suðurafrika, eftir at teir hava verið innistongdir í einum námi.
Sagt verður, at námsarbeiðararnir arbeiddu ólógliga í einum gullnámi í North West-landslutinum í landinum, tá teir vórðu innistongdir í november í fjør.
Síðan tá hevur verið arbeitt við at bjarga námsarbeiðarunum úr náminum, men tað hevur ikki eydnast, og nú er so langt fráliðið.
Í dag sigur ein talsmaður hjá námsarbeiðarum, at tað hevur eydnast at fáa eina fartelefon upp úr náminum, og á telefonini eru myndir av fleiri tíggjutals líkum.
Ein løgreglumaður, sum tíðindastovan NTB endurgevur, sigur, at arbeitt verður framvegis við at staðfesta talið av deyðum í gullnáminum í Suðurafrika.
