Íslendska hondbóltssambandið ætlar saman við norsku og donsku hondbóltssambondunum at vera vertur fyri HM-endaspælinum í manshondbólti í antin 2029 ella 2031.
Tey trý norðurlendsku hondbóltssambondini hava sent eina formliga umsókn til altjóða hondbóltssambandið, IHF um at sleppa at hýsa HM í manshondbólti.
Tað sigur stjórin í íslendska hondbóltssambandinum, Róbert Geir Gíslason við íslendska kringvarpið, RÚV.
Ein nýggja tjóðarhøll fer at standa klár í Reykjavík í 2026.
Ísland hevur eina ferð áður verið vertur fyri HM í manshondbólti. Tað var í 1995.
