– Mær dámar væl at hava ávirkan og ábyrgd. Eg havi eisini altíð havt dirvi til at taka við avbjóðingunum, sum eg havi fingið. So eg brúkti ikki nógva tíð at hugsa meg um, áðrenn eg tók av tilboðnum um at gerast stjóri í Betri Trygging.
Soleiðis sigur Ingunn Eiriksdóttir, sum er nýggjur stjóri í Betri Trygging – tað sum fyrr kallaðist Tryggingarfelagið Føroyar, í drúgvari samrøðu í Vinnuni, sum er eykablað í Sosialinum í dag.
Ingunn Eiriksdóttir, sum er uppvaksin í Lopra, er útbúgvin løgfrøðingur og hevur diplom í leiðslu, og hon hevur sitið í stjórastørvum tey seinastu 10 árini. Frá 2007 til 2013 var hon stjóri í Dataeftirlitinum, og hon hevði verið miðfyrisitingarstjóri hjá Tórshavnar kommunu í fýra ár, tá hon brádliga fekk í boði at taka við sum stjóri í Betri Trygging.
Tá hon gjørdist stjóri í Dataeftirlitinum, varð stovnurin júst umskipaður, og høvuðsuppgávan hjá stjóranum var at byggja upp og skipa arbeiðið á stovninum. Og júst hetta at byggja upp, dámar henni sera væl.
Í samrøðuni sigur Ingunn Eiriksdóttir, at tá hon byrjaði sum stjóri í Dataeftirlitinum, vistu fólk næstan ikki, hvat Dataeftirlitið var. Hetta setti hon sær fyri at broyta, og arbeiddi miðvíst eftir einari strategi við fimm málum, sum hon legði høvuðsdentin á. Samstundis tók hon leiðsluútbúgving.
Eftir seks ár í stjórasessinum í Dataeftlitinum hevði hon rokkið tey mál, sum hon hevði sett sær fyri, og hon hevði nú hug at royna seg í einum størri høpi við fleiri avbjóðingum og fleiri starvsfólkum.
– Eg søkti starvið sum miðfyrisitingarstjóri hjá Tórshavnar kommunu, og fekk tað. Har treivst eg eisini sera væl, til hetta starvið brádliga kom framvið.
– At vera stjóri í miðfyrisitingini hjá Tórshavnar kommunu var sera avbjóðandi, og at arbeiða í einum politiskum bygnaði gevur nakrar eyka avbjóðingar, sigur Ingunn Eiriksdóttir, sum nú hevur tikið við fyrsta stjórastarvinum í privatu vinnuni.
Lesið alla samrøðuna í Vikuskiftis-Sosialinum, sum fæst í lesasølu kring landið.
Blaðið kann eisini keypast í teldutøkari útgávu á www.sos.fo
