Aston Martin bilurin er til sølu við allari serútgerðini. Tað merkir, at eitt nú ein fjald maskinbyrsa fylgir við bilinum.
Tað er sveisiski millióningurin, Thomas Straumann, sum hevur sett bilin til sølu í Bretlandi.
Straumann keypti bilin í 2006 og brúkti síðani trý ár at seta bilin í stand. Bilurin gjørdist kendur í filmunum »Goldfinger« og »Thunderball«, tá ið Sean Connery nýtti hann í sínum leikluti sum James Bond.
Eftir at Straumann keypti bilin fyri 2.7 milliónir dollarar (umleið 15 milliónir krónur), á einari amerikanskari uppboðssølu, hevur hann arbeitt umleið 3000 tímar upp á bilin, sum nú er sum nýggjur.
Straumann hevur hildið fast við eyðkendu serútgerðina, sum Bond nýtti í filmunum, men hann hevur tikið burtur katapultsetrið, sum Bond nýtti til at koyra óynskt ferðafólk úr bilinum við.
