Skaðin Jens Pauli Poulsen hjá Team Klaksvík fekk í tí fyrra Europa Cup dystinum móti Sloboda Tuzla niðri í Bosnia Hersogovina er ikki so álvarsamur sum fyrst hildið.
Við in.fo sigur Jens Pauli Poulsen: - Krossbondini hjá mær eru IKKI slitin. Hetta var staðfest eftir eina MR skanning her heima í Føroyum. Eg havi tó fingið skaða í meniskin og og tí skal eg undir skurð. Hetta merkir at eg sleppi at spæla hondbólt aftur í hesum árinum. Eg skal undir skurð í viku 44 og átta vikur eftir tað skuldi eg verið nóg byrgur at spæla aftur. Sigur Jens Pauli Poulsen, ið av tveimum óndum heldur seg hava fingið tann frægari lutin, at krossbondini ikki eru slitin. Tá hevði tað mesta av einum ári gingið áðrenn hann var tøkur aftur.
Vika 44 er mánaðarskiftið oktober/november. Fyrsti dysturin hjá Team Klaksvík í Burn mansdeildini eftir ársskiftið er 24 januar, tá teir spæla móti VÍF í høllini í Vestmanna. Gongst sum ætlað verður Jens Pauli Poulsen tøkur tá.
