Jóan Símun Edmundsson er sloppin av við skaðan hjá sær, og hann var við í byrjunaruppstillingini hjá Vejle, sum í kvøld fekk vitjan av Næstved. Føroyski landsliðsleikarin spældi sum hangandi áleypari.
Tað byrjaði væl hjá Jóan Símuni. Einans 12 minuttir vóru spældir, tá ið hann legði Vejle á odda 1-0. Næstved misnýtti brotsspark stutt áðrenn hálvleikssteðgin, og tað skuldi vísa seg, at einki mál kom afturat í dystinum.
Jóan Símun Edmundsson, sum varð útskiftur í 72. minutti, gjørdist tískil sigursharri.
Við 1-0-sigrinum hevur Vejle nú átta stig eftir fimm dystir. Teir eru fyribils við í oddastríðnum í næstbestu donsku deildini, men tað kann broytast um vikuskiftið, tá ið flest øll hini liðini spæla tann dystin, sum tey hava til góðar í mun til Vejle.
