Føroyska náttúran er unspoiled og untouched. Soleiðis verða Føroyar lýstar fyri umheiminum í ferðavinnulýsingum. Grønu oyggjarnar eru eitt paradís - seinasti óspilti bletturin á jørðini. Hetta er helst eisini tað, vit siga okkum sjálvum - at vit í okkara parti av heiminum hava eitt tætt tilknýti til náttúruna.
Gerandisdagurin boðar tó frá einum øðrum veruleika. Vit eru nýmótans, vit fylgja við - vit koyra bilar sum fá onnur, nýta Facebook og Netflix og flúgva uttanlands, og hóast vit eru eitt fjarskotið land, eru vit tætt knýtt at umheiminum.
Hesin tvídáttur í okkara samleika, ikki bara í Føroyum, men eisini í Norðurlondum er eitt av temunum í JÖRÐ. Ein framførsla, íðsamantvinnar fleiri listagreinar og endurhugsar menniskjans samband við náttúruna og okkara pláss í heiminum. Ígjøgnum ljóð, fleiri løg av uppvørpum og dansi setur verkið náttúruna og mentanina, tað heimliga og tað alheimsliga upp ímóti hvørjum øðrum. Poppmentan, plastikk og høghælaðir skógvar møta norðurlendskum mýtum, hvøssum gróti og brúsandi brimi.
Verkið er eitt listarligt samstarv millum Mariu Guldbrandsø Tórgarð og Vár Bech Árting úr Føroyum, Lisen Pousette úr Svøríki, Tiia Kasurinen úr Finnlandi og Lil Lacy úr Danmark/USA - fimm listakvinnur, sum hava leitað saman tvørtur um landa- og listamørk.JÖRÐ er úrslitið, sum er sprottið úr samrøðum teirra millum um, hvørja áskoðan hesar kvinnur hava um sítt yrki, lond og menning í samfelagnum.
Júst hetta - sjónarhornið hjá kvinnuni kemur til sjóndar í framførsluni gjøgnum tulking av fleiri ikoniskum kvinnumyndum, m.a. Kópakonuni, Mariu moy, "Den lille havfrue", og Venus hjá Botticelli - allar eru kvinnumyndir, sum gjøgnum søguna eru tulkaðar av monnum, men sum í hesum verkinum eru í hondunum og verða tulkaðar av fimm kvinnum.
Gjøgnum uppvørpur, ljóðlist, dans og pallmynd kanna listakvinnurnar handan JÖRÐ, hvussu ymiskar listagreinar kunnu samstarva og soleiðis geva áskoðarunum eina víðkaða listauppliving.
Framførslan verður í Norðurlandahúsinum:
6. oktober, kl. 19.30
7. oktober, kl. 16.00
7. oktober, kl. 19.30
Eftir frumsýningina 6. oktober bjóða Norðurlandahúsið til listafólkaprát og eitt glas av brúsandi víni.
Keyp atgongumerki á nlh.fo
Koreografi og framførsla: Vár Bech Árting, Lisen Pousette og Tiia Kasurinen
Leikstjóri: Maria Guldbrandsø Tórgarð
Tónaskald: Lil Lacy
Ljósdesign og ljóðtøkni: Anton Skarborn
Búnar: Maibritt Marjunardóttir og Lydia Vermaat-Wallin
Filmfotograf: Barbara Lervig
Tónleikarar: Nordic String Quartet og Rune Kielsgaard (trummur)
Listarlig framleiðsla: Maria Guldbrandsø Tórgarð og Vár Bech Árting
Fyrisitari: Durita Sumberg
Samframleiðari: Norðurlandahúsið í Føroyum
Stuðlar: Nordisk kulturkontakt, Nordisk kulturfond, Mentanargrunnur Landsins og Tórshavnar Kommuna
