- Eg eri sannførdur um, at eitt alment tunnilsfelag eigur at gera Skálafjarðartunnilin.
Tað sigur Johan Dahl, landsstýrismaður í vinnumálum, sum eisini hevur ábyrgdina av fólka- og farmaflutningi millum oyggjarnar.
Johan Dahl er av tí greiðu fatan, at einasta verkætlan, ið kann vera við til at fíggja víðari útbygging av samferðslukervinum í Føroyum, er eitt alment tunnilsfelag.
- Skálafjarðartunnilin kann geva neyðugu inntøkuna, soleiðis at Sandoyartunnilin kann gerast veruleiki, sigur Johan Dahl.
Út frá hesi sannføring heldur landsstýrismaðurin í vinnumálum tí, at landið eigur at gera neyvar útrokningar, sum vísa, hvussu eitt alment tunnilsfelag kann fíggja framtíðar samferðsluútbyggingar.
- Tað má gerast, áðrenn landið í óðum verkum bindir seg til eina privata tunnilsloysn, sigur Johan Dahl.
Á ólavsøku verða tvey uppskot um Skálafjarðartunnil borin í løgtingið. Landsstýrismaðurin í innlendismálum ber uppskot um privata tunnilsloysn í tingið. Og andstøðan kemur við uppskoti um at seta á stovn eitt alment tunnilsfelag til endamálið.
Sambært Johan Dahl arbeiðir Vinnumálaráðið við einum notati, ið skal lýsa, hvussu framtíðar samferðsluútbyggingar best verða gjørdar.
Landsstýrismaðurin í vinnumálum fjalir tó ikki fyri, at verandi uppskot um privata tunnilsloysn hóvar honum lítið.
- Tað havi eg gjørt greitt á landsstýrisfundi, og eisini kennir løgmaður mína støðu, sigur Johan Dahl.
Hoyr samrøðu við Johan Dahl her:
