Føroyski landsliðsleikarin, Pernille Brandenborg og liðfelagarnir í Keypmannahavn spældu í dag á heimavølli seinna Play Off dystin um rættin at taka lut í bólkaspælinum í EHF European League móti spanska liðnum, Malaga.
Keypmannahavn megnaði javnleik 29-29 á útivølli í Spania, og hevði tí eitt gott útgangsstøðið, men tað megnaði Keypmannahavn ikki at gagnnýta.
Malaga vann í dag 25-20 á Keypmannahavn, og harvið ein samlaðan 54-49 sigur. Tað verður tí Malaga sum fer at royna seg í bólkaspælinum í EHF European League.
Tað haltaði serliga hjá Keypmannahavn í fyrra hálvleiki. Í steðginum var Malaga á odda 14-8. Keypmannahavn var eisini greiður favorittur hjá veddingarfyritøkunum, men tær megnaðu ikki at liva upp til favorittleiklutin.
Pernille fekk ein málmøguleika í dystinum, og hon setti hann í netið.
HM í hondbólti er skjótt í hondum og tí spælir Keypmannahavn ikki aftur fyrrenn 3. januar í 2024. Tá spæla tær á útivølli móti Nykøbing Falster í bestu donsku hondbóltsdeildini.
