Kommunuval
Tvøroyri: Er tað nakað, sum er heilt vist eftir býráðsvalið á Tvøroyri týskvøldið, er tað at borgarstjórin tey næstu fýra árini verður javnaðarmaður.
Av teimum sjey býráðslimunum á Tvøroyri, fekk javnaðarflokkurin fýra umboð og kann sostatt skipa meirilutan einsamallir.
Mong mettu, at javnaðarflokkurin spældi við krút, tá ið teir tóku gamla tjóðveldismannin, Kristin Michelsen, upp í flokkin sum jokara til hetta býráðsvalið.
Men teir fingu sanniliga fulla úrtøku burturúr, tí teir fingu ein býráðslim afturat og hava nú fýra og sostatt meiriluta einsamallir.
Ella sum toppskorarin, Kristin Michelsen segði eftir valkvøldið:
? Vit kunnu róliga leggja okkum at sova í kvøld, tí tað hevur í hvussu so er ongin skipa samgongu fyri nøsini á okkum, ímeðan vit liggja í fasta svøvni.
Ì hesum liggur eisini, at javnaðarmenn ætlaðu at taka sær tær stundir sum kravdust, áðrenn teir skipaðu nýtt býráð.
Hóast teir hava møguleikan at skipa samgongu einsamallir, er tað ikki vist, at teir fara at brúka hendan samgongan.
Fleiri aðrir býráðslimir løgdu til merkis, at í sjónvarpinum eftir valið læt Kristin Michelsen dyrnar upp fyri samstarvið tvørtur um floksmark.
Við Sosialin sigur hann, at hetta er ein spurningur, sum skal takast upp við javnaðarfelagið á Tvøroyri.
? Vit hava møguleikan at skipa samgongu einsamallir, men um vit brúka tann møguleikan framum eitt samstarv við aðrar flokkar, er ein annar spurningur. Tað er eitt mál, sum skal viðgerast innanfloks, sigur Kristin Michelsen.
Spurningurin er so, hvør verður borgarstjóri á Tvøroyri.
Kristin Michelsen dylir ikki fyri, at fær hann tilboðið, tekur hann av.
Hinvegin er tað ikki til fyrimuns fyri hann, at hann er kendur tjóðveldismaður, sum er akkurát er komin upp í javnaðarflokkin og tað er onki dulsmál, at tað hóvar summum javnaðarfólkum illa, at tey skulu velja júst hann til borgarstjóra.
Hinvegin kann tað vera trupult at sleppa uttanum hann, tí hann hevði eitt avbera gott val og fekk so nógv flestar atkvøður á javnaðarlistanum. Hann skoraði heilar 225 atkvøður, sum er næstan tríggjar ferðir so nógv, sum hann fekk á seinsata vali. Tað er eisini næstan tríggjar ferðir so nógv sum næsti maðúr á listanum.
Mett verður, at umframt Kristin Michelsen, er besta boðið upp á ein borgarstjóra á Tvøroyri, Pauli Einarsson, sum er næstvaldur á javnaðarlistanum við 87 atkvøðum.
Annars sigur Kristin Michelsen, at tað komandi býráð fer at arbeiða eftir sama leisti sum fráfarandi býráð.
Og hann leggur dent á, at eitt aðalmál hjá komandi býráðssamgonguni verður at lækka skattin, eftir at tey hava havt landsins hægstaskattaprosent í fleiri ár.
Krevja samanlegging
Annars tulkar Kristin Michesen valúrslitið í Suðuroynni sum heild, sum eitt tekin um, at suðuroyingar krevja, at kommunupolitikarar skulu meta oynna sum eina eind og skulu virka fyri at leggja kommunurnar saman.
Hann sipar serliga til úrslitið hjá borgarstjóranum í Vági, Jógvani Krosslá, sum gekk nógvar atkvøður aftur. Júst Jógvan Krosslá hevur verið íðin stríðsmaður ímóti at leggja oynna saman í eina kommunu.
?Hetta valið var ein ósigur hjá teimum, sum ikki vilja hava Suðuroynna í eina kommunu.
Tí skilir hann framvegis ikki, at hinar kommunurnar í oynni ikki vildu hava vegleiðandi fólkaatkvøðu um kommunusamanlegging, eins og tað var í Sumba og á Tvøroyri.
? Royndirnar at savna oynna í eina kommunu fara at liggja frammaliga í arbeiðsskránni hjá nývalda býráðnum á Tvøroyri, sigur Kristin Michelsen.
? Útlitini fyri at samansjóða oynna í eina kommunu er júst tað, sum fer at gera komandi valskeiðið serstakliga spennandi, leggur hann afturat.
