Tað hevur gingið illa at fingið fatur í góðu vinningunum hjá teimum, sum hava fingið fulla plátu í gekka-spælinum seinastu vikurnar.
Soleiðis var kvøldið í kvøld einki undantak.
Hjólið hevur ikki ordiliga havt hug at steðga á leypunum við teimum góðu vinningunum, hvørki góða pengavinninginum, ei heldur Volvo-bilinum ella cruise-ferðini til Karibia.
Tað var Jóna Christiansen úr Æðuvík, sum royndi seg í kvøld. Hon hevði fulla plátu og slapp at snara gekka-hjólinum.
Høvuðsvinningurin, sum var á 700.000 krónur, var enn einaferð í gula leypinum, og hinir báðir góðu vinningarnir í ávikavist reyða og bláa leypinum.
Í fyrstu royndini steðgaði hjólið á 20.000 krónum, og her helt kvinnan úr Æðuvík, at hon fór at gera eina roynd aftrat.
20.000 krónur er nevniliga minsti vinningur, tá hjólið verður snarað.
Í aðru royndini steðgaði hjólið á 40.000 krónum, sum er ein góður vinningur.
Jóna Christiansen flenti eitt sindur, men helt síðan fyri, at hon fór at royna eydnuna einaferð aftrat og seinastu ferð í hesum umfari.
Í triðju royndini steðgaði hjólið aftur á 20.000 krónum, eins og í fyrsta drátti, og hetta gjørdist eisini vinningurin hjá henni í kvøld.
- 20.000 krónur er nógvur peningur - í øllum førum í mínari verð, segði fryntligi verturin, Jan Gardar.
- Yes, tað haldi eg eisini, segði Jóna Christiansen úr Æðuvík og takkaði fyri vinningin.
Orðið "nappa", sum vit brúka í yvirskriftini í kvøld, merkir sambært sprotin.fo "... at royta broddin av ull, áðrenn hon verður virkað til tógv..."
Men, sum nevnt í yvirskriftini, lata góðu leypavinningarnir seg ikki nappa í løtuni.
