Gilli R. Sørensen byrjaði inni fyri Odd, sum í útidysti í bestu norsku fótbóltsdeildini vann 1-0 á Vålerenga.
Tíverri mátti Gilli skiftast út longu tá 25 minuttir vóru farnir av fyrra hálvleiki. Enn frættist ikki hvussu álvarsamt tað er hjá Gilla, ella um hann skjótt sleppur á vøllin aftur.
Sigurin, ið Tobias Lauritsen tryggjaði Odd, tá ein tími var leiktur av dystinum var sera týdningarmikil. Við sigrinum hevur Odd 15 stig á 10. plássi, og frástøðan til Jerv á næstaftasta plássinum, ið merkir niðurflyting til næstbestu deildina er nú átta stig.
Mikukvøldið spælir Odd móti júst Jerv á útivølli í norsku steypakappingini.
Komandi leygardag tekur Odd móti Bodø/Glimt í landskappingini. Talan er um seinasta dystin hjá Bodø/Glimt áðrenn teir møta KÍ í Champions League undankappingini mikudagin 6. juli klokkan 17 føroyska tíð.
