Framgongdin í búskapinum nær eisini útjaðaran. Vágur, sum í kreppuárunum var fyri sera stórum bakkasti, líkist nú mest einum stórbýi, um hugsað verður um virksemi og harav standandi ferðslu.
Nýtt og framkomið fiskavirkið er júst farið í gongd við framleiðslu, eins og annað virksemi hevur tikið dik á seg.
Annað eyðkenni fyri framgongdina er økt byggivirksemi og eisini her er Vágur við.
Litaval í Vági hevur í mong ár húsast í leigaðum hølum, men nú verður bøtt um umstøðurnar. Litaval byggir nú nýggj høli, ið liggja væl fyri við bryggjuøkið. Hetta merkir samstundis, at handilshølini liggja miðskeiðis í bygdini og við høvuðsvegin.
Nýggju hølini liggja í handilsumhvørvi millum aðrar handlar í miðum býi.
Nýggi bygningurin verður innilokaður fyri jól og væntandi verður latið upp fyrst í apríl.
Umstøðurnar verða munandi betraðar, tá flutt verður í nýreista bygningin, ið eisini hevur góðan kjallara. Farið verður tá úr 67 fermetrum og í nýggju hølini, ið eru eini 160 fermetrar.
