Frá klokkan 20.30 - 21.30 í kvøld verða tað fleiri, sum sløkkja ljósið kring knøttin. Í kvøld er nevniliga sokallaður "Earth Hour", tá sjóneykan verður sett á jørðina.
"Earth Hour" byrjaði í Sydney í Avstralia í 2007 og er nú heimsins størsta umhvørvissliga grasrótarrørsla, og fleiri milliónir taka lut í árliga átakinum til frama fyri umhvørvið. Endamálið er at varpa ljós á veðurlagsbroytingar, umhvørvisvernd og lívfrøðiligt margfeldni.
Eisini í Føroyum velja fleiri kommunur at varpa ljós á "Earth Hour" við millum annað at sløkkja gøtuljósini hendan tíman, og eggja til, at borgarar sløkkja alt ljósið hendan tíman.
Slagorðið fyri "Earth Hour" í ár er #Connect2Earth og við at leita eftir hesin hashtagginum á sosialu miðlunum ber til at síggja, hvussu onnur menniskju kring heimin halda Earth Hour og fyribyrgja verðurlagsbroytingum.
