Trolarin Gullberg er sokkin norðanfyri, og manningin er bjargað.
Sjóbjargingarstøðin MRCC Tórshavn sigur soleiðis um hendingina:
Kl 0815 í morgun fekk MRCC-Tórshavn boð frá alarmcentralinum um, at trolarin Niels Pauli hevði boðað frá, at trolarin Gullberg hevði brúk fyri pumpum, tí hann lak illa í maskinrúminum.
Gullberg, sum partrolaði við Sjagakletti, var staddur á makrelfeltinum norðanfyri. Á somu leið vóru eisini millum aðrar Niels Pauli, Steintór og móttøkuskipið Atlantic Orion.
Tyrlan og Brimil fingu boð um at fara til hjálpar. Tvær pumpur blivu fluttar umborð á Gullberg, ein frá Niels Paula og ein frá Atlantic Orion. Men hóast hetta eydnaðist ikki at halda skipinum lens.
Kl 0841 boðar Niels Pauli frá, at nú eru bert tríggir menn eftir umborð á Gullbergi, sum nú flýtur tungt í sjónum og hevur stóra slagsíðu.
Kl 0853 boðar Niels Pauli frá, at øll manningin á Gullbergi, níggju í tali, er bjargað umborð á Sjagaklett. Tað vóru mob-bátarnir hjá Niels Paula og Sjagakletti, sum fluttu manningina av Gullbergi umborð á Sjagaklett. Gullberg hevur nú 70 stig slagsíðu, og hekkan er um at fara undir.
Kl 0901 boðar Niels Pauli frá, at Gullberg er sokkin á positión 63º30,5 N 007º15,7V.
Gullberg er heimahoyrandi í Hvalba, og tað er pf. Jókin, sum eigur skipið. Mikkjal Hammer er útgerðarmaður á Gullbergi.
Gullberg er bygdur á Peene-Werft í Wolgast í Týsklandi í 1997. Skipið er góðar 36 metrar til longdar og 11 metrar breitt. Sambært Skipalistanum kallaðist skipið Anatoliy Gugunov og var skrásett í Murmansk í Russland, áðrenn tað í 2012 fekk navnið Gullberg.
Myndina hava vit fingið frá www.skipini.fo.
