Í gjár hevði løgreglan eitt átak í høvuðsstaðnum, har tey serliga hugdu eftir, um bilførarar tosa í handhildnari fartelefon, meðan koyrt verður.
Vaktleiðarin á løgreglustøðini visti í morgun at siga, at hetta var eitt átak, sum tey høvdu í tímunum millum klokkan 11 og 13.
- Her vísti tað seg, at heili 14 mál vórðu skrivað, og tað merkir, at 14 bilførarar nú fáa eina bót fyri at tosa í handhildnari fartelefon undir koyring.
Lagt verður aftrat, at í Føroyum gevur eitt slíkt brot 1000 krónur í bót, men í Danmark, har ferðslulógin á hesum øki er strangari, gevur hetta eisini klipp í koyrikortið.