Í dag fyllir Jógvan Telling Joensen, tónleikar og tónaskal, 75 ár. Í eini heilsan til hansara skrivar Marius Rein, sum í mong ár var teknikari í Útvarpi Føroya, um sangin »Meg minnist eina mynd«, sum hann sigur fyrstu ferð var at hoyra í Barnaútvarpinum hjá Kristonnu Jespersen í 1977.
Marius Rein greiðir frá, at hann og Kristianna Jespersen, sum doyði 37 ára gomul í 1982, tóku sær av barnaútvarpinum hesa tíðina.
Marius Rein greiðir soleiðis frá:
– Meg minnist eina mynd, sangurin hjá Jógvan Telling Joensen, sum ljómadi í útvarpinum júst nú, Jógvan fyllur 75 i dag.
Árini meðan Jógvan las hevði hann lestrasstarv í útvarpinum, soleiðis eisini á sumri í 1977.
Kristianna Jespersen, sála, og eg tóku okkum av barnaútvarpinum, og ein týsdag í juli mánað, eg hevði summarferiu og arbeiddi upp á húsini sum vit bygdu, kom Kristianna niðan til min at tosa um barnautvarpssendingina hetta kvøldið.
– Eg mælti henni tá til at orða við Jógvan um onkran sang, og eisini Elin Heinesen var í útvarpinum hetta summar, og bað eg Kristiannu um at fáa hana at lesa okkurt.
– Væl bar til. Í barnaútvarpinum hetta kvøldið hoyrdist fyri fyrstu ferð sangurin »Meg minnist eina mynd«, sum Jógvan og Elin sungu.
Til lukku við teimum 75 Jógvan, skrivar Marius Rein.