Í dag hevur Russland enn einaferð framt dronuálop á ukrainska svartahavsbýin, Odessa.
Sambært Kyiv Independent rakti dronan ein íbúðarbygning og oyðilegði 18 íbúðir.
Í kvøld sigur bjargingartænastan í økinum, at higartil eru sjey fólk funnin deyð í leivdunum av íbúðarbygninginum, harav fleiri eru børn.
Ukrainski forsetin, Volodomyr Zelenskyj, heitti í kvøld á sameindar um at bera seg skjótari at við nýggjum vápnaveitingum.
- Innanhýsis politiskt spæl og ósemjur avmarka verjuna hjá Ukraina. Vit biðja ikki um meir enn neyðugt fyri at verja mannalív, legði forsetin aftrat.
