Tíðindaskriv:
Bónus steypakappingin, kvinnur:
Fleyr – Mjølnir 3-1 (23-25, 25-18, 25-23, 25-15)
Fleyr vann í gjárkvøldið týdningarmiklan sigur á Mjølni í bólki 2, har eisini Dráttur og Ternan, sum spælir í næstbestu deildini, eru. Týdningurin av sigrinum var stórur, tí sannlíkt er nú, at Fleyr vinnur bólkin og skal tí spæla ímóti nr. 2 úr bólki 1 í hálvfinaluni. Í bólki 1 eru KÍF, TB og FM-silvurvinnarin SÍ. Mjølnir hevur framvegis góðar møguleikar at koma í hálvfinaluna, men skal so mest sannlíkt spæla ímóti vinnaranum av bólki 1.
Líkt var til, at Fleyr ætlaði at gera skjótt av í at vinna fyrsta sett, tá støðan gjørdist 7-1, men eftir leikbrá vann Mjølnir næstu átta stigini og legði seg á odda 9-7. Fleyr endurvann leiðsluna og fór framum 20-17 og 23-21, men so vann Mjølnir næstu fýra bóltarnar og settið 25-23. Tey bæði síðstu stigini vóru bæði vunnin við serviessi frá Mariu Teresu Vitalis.
Fleyr fekk tó somu flúgvandi byrjan upp á annað sett, sum upp á fyrsta, og legði seg á odda 6-0, men smátt um smátt nærkaðist Mjølnir aftur og javnaði til 16-16. Gleðin var kortini stokkut, tí Fleyr vann næstu sjey stigini upp í slag, har Anja S. Danielsen vann nógvar bóltar á vinstra kanti, áðrenn settið 787kjm +varð vunnið 25-18.
Mjølnir hótti tó aftur í triðja setti og var frammanfyri stóran part av settinum, men eftir 22-21 til Mjølnir vann Fleyr næstu trý stigini og fekk tveir settbóltar og gjørdi sær dælt av tí seinna og vann settið 25-23. Aftur her var Anja S. Danielsen rættiliga avgerandi móti endanum.
Í fjórða setti var als eingin spenningur, og Fleyr var á odda alt settið á tamb, sum at enda varð vunnið 25-15.
Í kvøld kl. 19 spæla hini bæði liðini í bólkinum, Dráttur og Ternan, á Giljanesi.
Mynd: Fleyr
