Henda nýggja fløgan, 'Musical Gems', hjá Ad Libitum er eitt savn av upptøkum, ið ongantíð hava verið givnar út fyrr. Her eru tveir sangir, sum Hermannn Jacobsen (19421988) sang inn í 1979, tá ið tað virkismikla Sjónvarpsfelagið tók upp í Líknum í Eysturoynni. Milson Zachariasen tók ljóðið upp, og Torbein Rein filmaði.
Kassettan Ad Libitum - Soft Classics - kom út í 1983, og sama innihaldið kom út á fløgu í 1993. Sjónvarp Føroya tók 12 løg upp í Havnar Klubba í 1997 til sjónvarpssendingina Ad Libitum millum vinir. Ætlanin var at leggja hesi løg á fløgu, men eitt óhapp bar í sær, at frambandið hvarv.
Seinni fann Ad Libitum eitt hampiliga gott kassettukopi, og á hesi nýggju fløguni eru fleiri løg, m.a. sangirnir við Duritu Dam og Robert McBirnie. Heðin Thomsen útvegaði upptøkuútgerð, og Ad Libitum fór undir at taka nýggj løg upp í 2015, men heilsan hjá Thomas Michael Smith (1936-2017) fór at bila so meint, at bara tvey løg, Ständchen og Russisk romansa, vóru liðug.
Upprunin til Ad Libitum spratt í 1976, tá ið Thomas Michael Smith og Finnbogi Johannessen spældu á mentanarstevnu í Føroyum, og síðan fóru teir tríggir, Thomas Michael Smith, Poul Engberg Poulsen (1921-2000) og Finnbogi Johannessen at hugna sær við mandolin- og guitarspæli. Teir tríggir fingu Hans Christian Clementsen, guitar, Niels Símun Johannesen, bass, og Christian Poulsen, slagverg, upp í orkestrið, og soleiðis varð Ad Libitum til við tí tónleiki, ið hevur eyðkent orkestrið síðan 1977 til henda dag.
