Nú er aftur ráðiligt at fara undir eina avmarkaða veiði av nebbafiski í sjóøkinum ímillum Føroyar og Ísland.
Tað er ein av niðurtøðunum, NAMMCO hevur tikið eftir stóru og umfatandi hvalateljingina í 2015. NAMMCO er nevndin, sum umsitur havsúgdjórini í Norðuratlantshavi og eitt úrslit av hvalateljingini í 2015, er, at tað aftur er ráðiligt at áseta eina kvotu fyri nebbafiskaveiði.
Í hesum sambandi er niðurstøðan hjá NAMMCO, at tað er ráðiligt at veiða 46 nebbafiskar um árið í økinum ímillum Eysturísland og Føroyar.
Og eftir fund í NAMMCO í síðstu viku, har hvalateljingin varð viðgjørd, stendur fast, at tað tilmæli stendur við. Bjarni Mikkelsen, hvalagranskari á Tjóðsavninum, sigur, at hetta er eitt langtíðartilmæli til 2025.
Hann hevur áður upplýst fyri Sosialinum, at eitt úrslit av hvalateljingini er, at tað hevur aldrin verið so nógv til av nebbafiski í nakrari hvalateljing frammanundan, sum tað var í hesari seinastu.
Hann sigur, at teljingin vísir, at stovnurin av Nebbafiski hevur verið í støðugari menning og at stovnurin er komin upp um 50.000 hvalir í Norðuratlantshavi. Men í økinum ímillum Føroyar og Ísland eru eini 25.000 nebbasfiskar.
Í Sosialinum í dag hava vit nógv meiri um stóru hvalateljingina í 2015, og tað er rættiliga hugaligur lestur fyri føroyingar og okkara grindadráp.
