Tað eru bara tær tríggjar Effostøðirnar í Suðuroy, sum enn selja brennievni til bilar. Tí hevur ávís ferðsla verið við Smyrli, har til dømis bussar eru komnir norðanífra suður at bunkra.
Men hesum seta fakfeløgini í verkfalli nú ein stoppara fyri.
Hesum boðar Strandferðslan frá í kvøld.
– Undantaksloyvið til fulla sigling við ferðafólki og akførum, ið Strandferðslan hevur frá arbeiðarafeløgunum í verkfalli, verður nú broytt, so at øll akfør longri enn 7 metrar, ið ferðast við Smyrli á Suðoyarleiðini, skulu hava undantaksloyvi til hesa ferðing frá arbeiðarafeløgunum í verkfalli. Undantikin hesa áseting eru sjúkrabilar og neyðsynjarakfør. Broytingin fær gildi nú á midnátt, kl 00:00, mikudagin 29. mai.
