Málið verður viðgjørt á Løgmansskrivstovuni, sum varðar av aðalstjórunum, og Johan Dahl hevur avtalað við Arna Poulsen, at hann sleppur at halda fram í starvinum, til málið er kannað.
Vit hava fyrr upplivað, at løgtingsmaður hevur gjørt sama brølara, enntá bara fáar metrar frá garðinum, sum Arne Poulsen rendi á.
Ta ferðina megnaði løgtingsmaðurin at sláa málið upp í glens, hóast hann átti at skammast og lagt frá sær sum løgtingsmaður.
Hvussu verður við Arna Poulsen frætta vit helst um stutta tíð. Men var skomm skapt í aðalstjóranum, so legði hann frá sær beinanvegin. Tað er eingin orsøk til at løgmaður (sum hann plagar) skal flyta hann í eitthvørt ráðgevarastarv í Fiskimálaráðnum við fullari aðalstjóraløn og pensjón – ella hvat annað politiska skipanin kann finna uppá at gera við aðalstjórar, sum ikki kunnu brúkast.
Sum aðalstjóri kann hann væl saktans ikki halda fram, tí tað mugu vera álitisfólk, sum røkja slík størv. Ikki menn, sum koyra fullir og rýma undan løgregluni.
