Politiskt er tað ikki serliga búgvið at sletta seg frá sínum sjónarmiðum. Eitt er, at Jóna Mortensen sum øll hini í samgonguni má fylgja sjónarmiðunum hjá nýggja leiðaranum í Føroyum, Jørgeni Niclasen.
Men tað eru sanniliga nógvir menn, sum eru nógv størri svíkjarar, enn Jóna Mortensen, sum »bara« er eitt varafólk, sum heldur ein løgtingsessi heitan fyri ein landsstýrismann.
Hóast tingfólk fyrst og fremst hava sína egnu samvitsku at halda seg til, so hava tey eisini flokkin og samgonguna – og tað er har, sum valið hjá Jónu Mortensen stendur. Samgongan – og aðalmálini hjá Fólkaflokkinum – fram um hennara egnu sannføring. So tá Jóna Mortensen hevur sum hjartamál at hjálpa sjúkum og óhjálpnum og at tryggja eldraheim til borgarar nógv betur, enn Heðin Mortensen og Tórshavnar Kommuna klára, so eru hetta bara nøkur hjartamál, sum í hesum samgonguhøpi gerast lótir. Tí flatskatturin hevur alt at siga. Flatskatturin er legitimiteturin hjá hesi samgongu. Uttan flatskattin, so er samgongan ikki til. So einfalt er tað.
Men fyri føroyska veljaran hevur tað nógv størri týdning, at til dømis Miðflokkurin og serliga Jenis av Rana hevur svikið síni vallyfti so eftirtrykkiliga. Her hava vit ein flokk og ein serliga markantan politikara, sum hevur koyrt seg sjálvan fram sum verja hjá teimum á niðastu rókum, og sum nú ger beint tað øvugta.
Gott nokk hevur Fólkaflokkurin svikið síni vallyfti við at fara at samráðast um hægri blokkstuðul. Men kenna vit Fólkaflokkin og Jørgen Niclasen rætt, so eru hetta bara lótir fyri at kyrra Kaj Leo Johannesen og Sambandsflokkin afturfyri, at Fólkaflokkurin hevur fingið politisku leiðsluna í Tinganesi. Tí Fólkaflokkurin veit væl, at alt tos um hægri blokk er utopi. Vit sleppa at prístalsviðgera framyvir, og fáa so einar 8-10 milliónir, sum hvørki gera frá ella til í tí stóra.
At Sjálvstýrisflokkurin er ein stokkkonservativur sambandsflokkur beint nú, tað er ikki so løgið, tí flokkurin hevur so mangan víst sítt politiska skitsofreni við skiftandi fólkum, sum koma drússandi úr ymsum flokkum.
Jú, í samgonguni eru sannliga menn, sum hava svikið nógv meira enn Jóna Mortensen.
