Kortini er tað púra alment, at útlendingar eru sera aktivir í føroyskari fiskivinnu gjøgnum strámenn.
Í sambandi við kjakið um tilfeingisgjald og um stóra vinningin í uppsjóvarvinnuni, er kjakið um útlendingar í vinnuni eisini aktuelt.
Jákup Jacobsen, stjóri á Varðanum í Gøtu, segði við Norðlýsið um vikuskiftið, at um búskaparfrøðingar við eini politiskari dagsskrá – sum Kári Petersen – halda fram við at leggja eftir vinnuni, so verður einki annað at gera, enn at selja.
– Og tá skal eingin lærdómur til at siga fólki, at tað bara verða útlendingar, sum hava ráð at keypa.
Altso ein beinleiðis hóttan frá einum av stóru aktørunum í uppsjóvarvinnuni um, at finna teir tað fyri gott, so selja teir. Og tað verður fyri so nógvar pengar, sum eingin føroyingar megnar at keypa.
Verður tað soleiðis, at teir, sum í dag hava veiðiloyvini, fara at selja hesi loyvi fyri ovurhonds stórar upphæddir, so verður ringt skil hjá teimum, sum tá skulu reka vinnu. Tá verður øll vinnan so skuldarbundin, at eingin møguleiki er til vinning.
Vit hava sæð, at skipini verða seld fyri fleiri ta upphædd, sum veruliga virði er. Í veruleikanum er tað veiðiloyvi, sum verður selt – og tað fer til tann, sum fer úr vinnuni. Tað vil siga, at nýggir aktørar í vinnuni mugu gjalda eitt ovurhondsstórt tilfeingisgjald. Men tað verður ikki goldið til almennu Føroyar, sum eiga loyvið – men til tann reiðararan, sum fer úr vinnuni.
Tað er hetta, ið fleiri ikki halda vera rætt.
Tilsamans eru einar 6-700 milliónir goldnar í slíkum tilfeingisgjaldi – sum altso er goldið til eigarar av skipum. Og parturin til almennu Føroyar – sum eigur fiskatilfeingið – er null krónur.
Men støðan kann gerast enn verri. Sum búskaparfrøðingurin vísir á í blaðnum í dag, so er einki, sum forðar teimum, sum í dag eiga skipini, at selja tey fyri sjey milliardir krónur og harvið verður samlaða skuldin hjá fiskivinnuni einar níggju milliardir krónur.
Tað bendir so ikki á, at politiska skipanin hevur skapt nóg tryggar karmar kring vinnuna.
Um tað í staðin verður landið, sum sleppur at selja hesi rættindi kundi hvørt húski í landinum – sambært búskaparfrøðinginum – fingið 2.500 krónur í skattalætta um mánaðin.
