Og tað er so. Politikaralønirnar eru kanska ikki so høgar, um borið verður saman við lønir í toppstørvum í vinnulívinum annars. Men tá tað kemur til fráfaringarlønir og eftirlønir eru heilt serlig viðurskifti galdandi fyri politikarar.
Tað helt Kári P. Højgaard fyri tveimum árum síðani vera so órímuligt, at hann legði uppskot fram á ting um, at landsstýrismaður, sum fær fráfaringarløn og tekur sæti aftur á tingi, skal ikki fáa løgtingslønina, so leingi hann fær landsstýrislønina. Hetta uppskot hansara fall. Tingfólk plaga at kalla slíkt paraduuppskot, sum tingmenn koma við, tá tað passar teimum best, tá tað kann skaða onnur tingfólk og samstundis gera uppskotsstillaran populeran.
Nú er tað Kári P. Højgaard sum er í hesi støðu, at hann næsta hálva árið er hægst lønti landspolitikari í Føroyum, tí hann bæði fær løn sum landsstýrismaður og sum løgtingsmaður – eina løn upp á umleið 90.000 krónur, eins og skattafrí ískoyti fyri at koyra til Havnar.
Men heldur hann tað ikki verða passandi at leggja uppskotið framaftur, tí »løgmaður arbeiðir við málinum«.
Soleiðis snáka politikarar sær undan at taka slíkar avgerðir, sum fyri teir eru óbehagiligar, tí tað merkir, at onkur teirra skulu hava minni í løn – tó at tað er fyri einki at gera.
Soleiðis fer Kaj Leo Holm Johannesen at brúka milllum tríggjar og fýra milliónir krónur at gjalda fólkum fyri ikki at sita í landsstýrinum, samstundis sum tey fáa løn fyri at vera tingfólk. Av teimum 17 fólkunum, sum hava sitið í landsstýrinum hjá Kaj Leo (nøkur hava sitið tvær ferðir), eru fimtan teirra vald á ting. Tað merkir, at hesi tingfólk hava fingið góðar 1,8 milliónir krónur í tingmannaløn, meðan tey hava fingið landsstýrismannaløn. Teir pengarnir eru brúktir. Men løgmaður kann spara skattapengar við at broyta hesa skipanina beinanvegin. Tí ger hann tað, so kann hann spara 1,6 milliónir krónur, sum sitandi landsstýrisfólk fáa í tingmannaløn, taka tey sæti á tingi meðan tey fáa fráfaringarløn í landsstýrinum.
Hetta er dømi um alment oyðsl, sum kann sparast alt fyri eitt.
