At tað er stuttligt at geva, tað hava vit so mong dømi um. Politikarum dámar væl at geva, og tá alt fer úr stórapotti, so gongur tað nokk kortini. Málið um MVG frítøkuna er eitt gott dømi um hetta. Hetta er eitt gott dømi um, hvussu ein stórur partur av løgtinginum vil tekkjast ávísum áhugabólkum, uttan at gera sær greitt, hvussu hendan gávan skal fíggjast. Tingfólk hava ikki ánilsi fyri, hvussu pengarnir, sum nú skulu úr aftur landskassanum, aftur skulu fáast í kassan.
Men løgtingið hevur samtykt, at tey rokna við, at landsstýrismaðurin veit, hvat endaliga útreiðslan verður fyri 2010, og so fer hann at leggja fyri tingið uppskot, sum fer at siga, hvussu hendan útreiðslan skal gerast »útreiðsluneutral«. Tað merkir, at tað sum tað kostar hesum felagsskapum í spardum meirvirðisgjaldi, tað skal burturav frá onkrum øðrum. Tá er so lætt at vera gávumildur.
Og hyggja vit í álitið frá fíggjarnevndini, so síggja vit, at tingfólk hava ymsar meiningar um, hvussu langt aftur lógin við afturvirkandi kraft skal virka. Onkur sigur 1. januar 2010, meðan onkur annar sigur 1. januar 2009. Vit kunnu spyrja, hví tingfólk eru ósamd um tað? Kann tað vera tí, at ymiskt er, hvønn áhugabólk tingfólkini umboða? Og hví skal ein slík lóg verða samtykt við afturvirkandi kraft?
Uttan at taka støðu til tað, at løgtingið velur at taka ein bólk burtur úr mvg-skyldu á henda hátt, tí talan er um »almannagagnligt virksemi«, so mugu vit geva teimum fimm tjóðveldisfólkunum, sum atkvøddu ímóti uppskotinum, rætt í, at hetta er eitt dømi um, at løgtingið ger MVG-lógina meira fløkta, enn neyðugt er, og at tingfólk leggja seg undir eitt »almannagagnligt« trýst, sum kámar fyri eini skilagóðari viðgerð og einum skilagóðum úrsliti, sum var í tráð við tað, sum uppskotið snúði seg um av fyrstan tí, at flyta pengar av eini játtanarkonto til at slíkt virksemi verður frítikið fyri MVG.
Vit fara at loyva okkum at ivast í, um øll hesi 25 tingfólkini fara at taka undir við uppskotinum hjá Aksel Johannesen, sum fer at siga, hvørjum pengarnir skulu takast frá, sum tey hendan dagin samtyktu at geva. Kenna vit tingfólk rætt, so fara fleiri av teimum 25 at atkvøða ímóti, og so er alt, sum tað eigur at vera í Løgtinginum: Tað er nógv stuttligari at geva – enn at hækka skattin!
