Alternativið til sambands- og loysingarumboðini eru Javnaðarflokkurin og Fólkaflokkurin. Hesir flokkar hava ikki verið nóg eyðsýndir seinastu árini, og hava tí ikki megnað at ávirkað polariseringina, sum hevur verið millum Tjóðveldi og Sambandsflokkin. Men tað kann broytast so skjótt, og seinastu veljarakanningarnar hava víst, at Fólkaflokkurin og Javnaðarflokkurin hava hálað seg inn á hinar báðar flokkarnar.
Eitt annað, sum hevur verið eyðkent í hesum valstríðnum er, at Tjóðveldi stendur púra einsamalt um fullveldispolitikkin. Tað bendir á, at polariseringin millum Sambandsflokkin og Tjóðveldisflokkin viknar. Meðan Fólkaflokkurin, Sjálvstýrisflokkurin og Miðflokkurin eltu fullveldislinjuna hjá Tjóðveldinum frá 1998 til 2004, so eru orðið »fullveldi« púra strikað burtur úr teirra valskráum nú.
Sjálvstýrisflokkurin hevur tikið uppaftur »stig fyri stig-politikkin«, sum hann so ofta hevur verið speirikin við. Triksið hjá teimum er at venda hesum speii til sjálvsspei. Miðflokkurin hevur eisini slept fullveldinum fullkomiliga. Jenis av Rana tosaði í Andglettinum hetta kvøldið um, at Miðflokkurin er ein »sjálvbjargnisflokkur«. Hetta er ein bleyt millumformulering – fyri so vítt uttan týdning, tó at hon hevur tann týdning, at hann vil leggja sjógv millum Miðflokkin og fullveldi. Tí so fær hann ikki hasar 54 milliardirnar, sum hann ætlar sær frá dønum.
Fólkaflokkurin hevur eisini slept fullveldinum – so nógv, at hann er farin at tosa um eitt illusoriskt hugtak sum »ríkjafelagsskap«, har Føroyar, Danmark og Grønland kunnu samstarva á jøvnum føti.
Alt hetta bendir á, at tað verða onnur mál, sum verða havd á lofti til komandi løgtingsval. Tað merkir eisini, at polariseringin millum Tjóðveldi og Sambandsflokkin viknar – og tað kann merkja eina broyting á fólkatingsvalinum í morgin.
Tann broyting kann vera, at Fólkaflokkurin ella Javnaðarflokkurin taka annan sessin. Skulu vit gita, so dregur Sambandsflokkurin longra stráið. So er spurngurin, hvør av fólkatings-andstøðuflokkunum megnar at standa Tjóðveldinum kurl. Javnaðarflokkurin tykist betur fyri í so máta.
