Hóast løgmaður fyrst á Facebook og síðani í tíðindaskrivi í gjár boðaði frá, at hann var skeivt endurgivin, so stendur tað rimmar fast, at løgmaður er rætt endurgivin, og tað kunnu øll tey mongu fólkini, ið hoyrdu samrøðuna, vátta. Tað sker eisini í eyguni hjá okkum, at løgmaður nú – tíggju vikur eftir, at greinin stóð í Sosialinum, sigur seg vera skeivt endurgivnan. Serliga misteinkiligt er tað, at hann sigur tað, beint eftir at blaðið hevur prógvað, at eitt felag hjá honum hevur givið bæði landskassanum og privatum tap.
Bæði sum politikari og sum vinnulívsmaður mást tú taka ábyrgd. Tú mást taka ábyrgd av tínum gerðum, og tú mást taka ábyrgd av tí, tú sigur. Tað er at spæla høgt spæl at renna undan ábyrgd við leggja onnur undir órætt.
Á Sosialinum undraðust øll á tað, sum løgmaður segði, tí tað var eyðsæð, at tað ikki kundi passa, at feløg hansara fóru á húsagang uttan at páføra nøkrum tap. Tí settu vit okkum fyri at kanna hesi viðurskifti. Hevði løgmaður sagt sannleikan hendan dagin, so var støðan ein onnur. Tí tað er ein erlig sak at miseydnast ella ikki at røkka til sum vinnulívsmaður.
Tað er ikki kriminelt at fara á húsagang, og vit hava ikki lagt løgmann undir nakað kriminelt – og vit hava als ongan mistanka um, at hann persónliga skyldar landinum pengar. Tí hava vit als ikki spurt løgmann um tað.
Men vit spurdu løgmann, um ákærurnar, sum vórðu reistar móti honum og Jørgen Niclasen á Vágaportalinum vóru sannar um, at feløg hjá teimum hava givið landinum tap av eitt nú MVG.
Ein sera einfaldur spurningur. Men tað nívir helst hjá løgmanni alment at leggja fram, hvussu nógv hansara virksemi hevur kostað øðrum, harímillum landskassanum.
Av onkrari løgnari orsøk fáa fjølmiðlar ikki innlit í búroknskapir í Føroyum. Tað eru bara tey, ið varða av feløgunum og tey, sum hava mist pengar, sum fáa hetta innlit.
Hóast løgmaður í gjár boðaði, at búroknskapirnir eru almennir, og at ein og hvør kann fáa fatur á teimum, so er tað ikki so, sum løgmaður sigur.
Sosialurin hevur tí biðið løgmann útvega okkum búroknskapirnar, so teir kunnu almannakunngerast, men løgmaður svarar bert, at hann »hevur onga viðmerking«...
