Sama dag sum hendan broytingin fer fram, tekur BankNordik yvir helmingin av Lív, sum bankin soleiðis hevur keypt undir skeivum fortreytum frá landsstýrinum, tí talan verður ikki um tað gullnám, sum bankin helt tað verða, tá keypið varð avtalað.
Og sama dag kunnu tey í Føroyum, sum eru í tí ríkara endanum fegnast um, at nú verða tey enn ríkari, tí hendan dagin kemur skattalættin eisini í gildi. Skattalættin, sum verður fíggjaður við at skatta tær pensjónir, sum komandi ættarliðið av pensjónistum skal fáa einaferð í framtíðini.
Fáur hevði væntað, at uppskotið hjá Fólkaflokkinum hevði nakran kjans at vinna frama í politisku skipanini. Kanska serliga tí, at løgmaður sjálvur lovaði í valstríðnum, at vit fingu ongan skattalætta.
Men okkurt er broytt hjá løgmanni. Í øllum førum stendur hann sum leiðari fyri eini tí mest reaktióneru samgonguni í nýggjari tíð. So stórar broytingar, sum hendan samgongan hevur sett sær fyri, eru valla framdar síðani Javnaðarflokkurin fekk fólkapensjónina í gjøgnum eftir løgtingsvalið í 1958. Tí er tað av sonnum ein politisk kollvelting, stendur fyri framman.
Um tað er gott ella ring veldst um eygað, sum sær. Fyri tey lág- og miðalløntu hevur skattauppskotið millum lítlan og ongan týdning. Fyri tey við høgum inntøkum hevur uppskotið sera stóran týdning, tí tey við teimum feitu inntøkunum, tey kunnu gleða seg til at fáa upp í 7.000 krónur í skattalætta um mánaðin!
Bera vit saman við flakakvinnuna ella arbeiðsmannin – ella tann sum forvinnur umleið 200.000 krónur um árið – ein skattalætta upp á einar 75 krónur.
Tað merkir, at Sambandsflokkurin, Fólkaflokkurin, Sjálvstýrisflokkurin og Miðflokkurin halda tað vera í fínasta ordan, at skattalættin til tey ríku er 100 ferðir so stórum, sum skattalættin til tey á teimum niðastu rókunum.
Vit fingu tað stýri, vit hava valt. Mong á teimum niðastu rókunum hava valt hetta stýrið, sum hevur hevur ta hugsjón, at tey ríku skulu gerast ríkari...
