Løgmaður stendur klárur á perrongini í kvøld við floytuni, og tá er væntandi, at tokið koyrir – fyri at brúka terminologiina hjá løgmanni, sum hesaferð var jarnbreytin.
Sjálvstýrisflokkurin kann illa gera annað, enn fara úr samgonguni, eftir at løgmaður soleiðis hevur givið flokkinum og floksformanninum knívin í ryggin. Tí tað er júst tað, løgmaður hevur gjørt. Kári P. Højgaard er ikki orsøk til meira politiskt rumbul, enn sjálvur løgmaður, sum sjálvur hevur fløkt málið í ein ellubita. Kári P. Højgaard ætlaði at brúka sína heimild, sum hann sigst hava – og sum løgmaður fleiri ferðir hevur lagt dent á, at hann hevði. Tískil hevði støðan als ikki verið so fløkt, um løgmaður annaðhvørt ikki blandaði seg upp í málið hjá Kára P. Højgaard, ella um hann lurtaði eftir ávaringunum beinanvegin – heldur enn at koma sum ketta úr høvdatrog og steðga málinum í tólvta tíma. Tað er tí, at løgmaður sjálvur hevur fløkt málið, meðan Kári P. Højgaard væl og virðiliga kann siga seg at hava arbeitt í góðari trúgv.
Tað er sera ivasamt, hvussu trygt løgmaður nú kann føra tokið víðari. Samgongnan viknar uttan Sjálvstýrisflokkin, hóast meirilutin framvegis er intaktur.
Andstøðan stendur ikki so sterk, sum hon kundi, um Framsóknarflokkurin ikki var farin í tvíningar – og tey sum valdu Framsókn kunnu nú kanska síggja, at júst teirra atkvøða, sum skuldi vera eitt alternativ til Fólkaflokkin, verður avgerandi fyri, at sitandi samgongan kann halda fram. Ógvuliga sannlíkt er, at Janus Rein fer at gera sær dælt av støðuni, nú Jenis av Rana er veikasta liðið í ketuni hjá løgmanni.
Tað kann geva Janusi eitt gott høvi at koma inn í borgarliga samgonguhitan. Partur av landsstýrinum verður hann tó ikki, tí hann kann ikki lata tingsessin frá sær.
Tá tingfundur verður í moring verður valla reist misálitisuppskot á løgmann. Ger andstøðan tað uttan at hava tryggjað sær meirluta frammanundan, so skýtur hon seg í fótin, tí eitt miseydnað misáliti er eitt álit, og tað er valla tað, ið andstøðan vil geva løgmanni.
Hóast støðan er spent, so kann løgmaður føra tok sítt víðari. Men leiðslan er viknað, og tí kann tokið skjótt aftur fara av sporinum...
