Tað bleiv talan um eitt slakt kvøld hjá føroyingaliðunum í bestu donsku hondbóltsdeildini hjá kvinnum.
Føroyski landsliðsmálverjin, Rakul Wardum og liðfelagarnir í Ringkøbing taptu greitt 27-35 fyri Nykøbing Falster á heimavølli. Í steðginum var Nykøbing Falster á odda 16-14.
Rakul hevði eitt bjargingarprosent í málinum sum var 27 prosent, ið er rættiliga gott móti einum av toppliðunum í Danmark.
Ringkøbing er næstaftast í deildini við tveimum stigum.
Súna K. Hansen, Brynhild Pállsdóttir og liðfelagarnir í Ajax vóru á heimavølli fyri stórtapi 18-33 fyri Sønderjyske. Í fyrra hálvleiki gekk av skriðuni hjá Ajax. Sønderjyske var á odda heili 17-6 í steðginum.
Brynhild og Súna skutu eitt mál hvør. Súna vann eisini liðnum eitt brotskast.
Ajax er aftast í deildini og hevur framvegis fyrsta stigið til góðar hetta kappingarárið.
Jana Mittún og liðfelagarnir í Viborg vóru eisini fyri stórtapi á heimavølli. Viborg tapti á heimavølli 28-40 fyri oddaliðnum, Odense. Í steðginum var Odense á odda 20-14.
Jana skoraði eitt mál í kvøld. Viborg er nummar 10 í deildini við fýra stigum.
Føroyski landsliðsleikarin, Pernille Brandenborg og liðfelagarnir í Keypmannahavn taptu á útivølli 30-33 fyri Silkeborg-Voel. Heimaliðið var á odda 15-12 í steðginum.
Pernille megnaði at skjóta trý mál upp á tríggjar málroyndir.
Keypmannahavn er nummar níggju í deildini við fýra stigum.
