Fyribilskanningar benda á, at nýggi varianturin av koronuvirus - omikron - spjaðir seg sum eldur.
Granskarar siga nevniliga, at omikron spjaðir seg tvífalt so skjótt, sum delta-varianturin gjørdi í Suðurafrika.
Sambært suðurafrikanskum granskarum tvífaldast talið av smittutilburðum umleið triðja hvønn dag í landinum.
- Tað er órógvandi so skjótt, sum omikron spjaðir seg, sigur Juliet Pulliam á University of Stellenbosch í Suðurafrika við The New York Times.
Granskararnir halda, at samanhangur er millum smittandi eginleikarnar hjá omikron og evnini hjá virusinum at sleppa undan immunverjuni í kroppinum.
Higartil hevur verið sagt, at tað gevur næstan onga verju móti omikron, at tú hevur havt koronu.
Lagt verður aftrat, at enn er ikki komið á mál við hesi gransking.
