Ongin Henry bjarging hesa ferð

Arsenal misti í dag týðandi stig í oddastríðnum, tá Arsene Wenger og hansara menn taptu 3-2 móti Swansea. Heldur ikki ein innskiftur Thierry Henry kláraði at bjarga Arsenal. Í Newcastle vann heimaliðið á QPR.

Fyri triðju ferð í hesum kappingarárinum tapti Arsenal aftaná at hava verið á odda. Tað byrjaði annars sum tað plagar við Arsenal, tá Robin van Persie skoraði sítt mál nummar 18 í hesum kappingarárinum. Løtu seinni gjørdi walisin á Arsenal liðnum, Aaron Ramsey, brotsspark, sum Scott Sinclair skoraði uppá.

Í seinna hálvleiki kom heimaliðið á odda við máli, ið Nathan Dyer skoraði eftir at Arsenal misti bóltin í uppspælinum. Thierry Henry kom inn seinasta hálva tíman. Tað gingu bara minuttir frá tí hann kom inn til at Theo Walcott javnaði fyri London liðið. Men í minuttinum eftir málið, legði Danny Graham Swansea á odda 3-2, sum eisini gjørdist endaliga úrslitið.

Fyrr í dag vann Newcastle uttan Demba Ba og Cheik Tiote móti QPR, sum somuleiðis mátti verða leikarum fyri uttan orsaka av Afrika Cup of Nations, sum verður í næstum. Leon Best skoraði einsamalla málið í fyrra hálvleiki.

Dysturin var tann fyrsti hjá Queen’s Park Rangers við Mark Hughes á odda. QPR kundi fingið annað stigið um teir vóru neyvari frammanfyri málið.

Premier League:

Í gjár:

Aston Villa – Everton 1-1

Blackburn – Fulham 3-1

Chelsea – Sunderland 1-0

Liverpool – Stoke 0-0

Manchester United – Bolton 3-0

Tottenham – Wolverhampton 1-1

WBA – Norwich 1-2

Í dag:

Newcastle – QPR 1-0

Swansea – Arsenal 3-2

Mánadagin:

Wigan – Manchester City (20:00)