Tað er synd at siga, at samgongan dregur somu línu í spurninginum um, hvønn evropapolitikk, samgongan skal føra.
Tað varð skorið út í papp, táið Løgtingið hevði munnligar fyrispurningar á skránni í farnu viku.
Evropapolitikkurin skal vera framtíðar portur okkara út í heim, men nú hevur gamli sambandsformaðurin, Edmund Joensen, ið nú er løgtingsmaður og fólkatingsmaður, aftur fest í eitt gamalt kjak ímillum politisku flokkarnar um, hvørja leið, vit skulu ganga.
Tað gjørdi hann tá ið hann spurdi Jørgen Niclasen, landsstýrismann í uttanlandsmálum, hví hann ikki enn hevur sett tann skjótt arbeiðandi serfrøðingabólkin, sum samgongan hevur avtalað at seta at kanna greina møguleikarnar fyri tættari føroyskum tilknýti til ES - eisini møguleikan fyri at Føroyar gerast partur í ES.
Hann vil eisini hava at vita, nær arbeiðsbólkurin verður settur.
- Tað eru fimm mánaðir síðani, at samgongan varð skipað og enn hevur Jørgen Niclasen enn onki gjørt fyri at fáa gongd á kanningarnar um føroyskt tilknýti til ES.
Hann rør eisini framundir, at tað er brot á samgonguskjalið at onki er gjørt við málið.
Stórt arbeiði
Jørgen Niclasen sigur, at starvsfólk í uttanríkisráðnum hevur lagt stórt arbeiðið at fyrireika arbeiðið so væl sum gjørligt, so at vit fáa eitt úrslit, sum vit kunnu brúka til nakað.
Annars er tað ikki fyrrenn á nýggjárinum, at peningur var tøkur til at seta kanningina í verk fyri.
Annars vísir Jørgen Niclasen, at tað tók tíð at finna tey røttu fólkini.
Men tað gongur ikki long tíð, til arbeiðsbólkurin kann gerast.
Poul Michelsen í Fólkaflokkinum heldur, at tað er eitt egotripp hjá Edmund Joensen at seta ein spurning sum hendan, ella er hann bara úti eftir at lima Føroyar inn í ES – undir Danmark.
Hann tekur annars fult undir við arbeiðnum hjá samgonguni.
Jørgen onki at gera
Magni Laksáfoss í Sambandsflokkinum sigur, at talan er tvørtur ímóti um ein sera viðkomandi spurning.
- ES hevur avgerandi týdning fyri at menna Føroyar og Jørgen Niclasen hevur eina stóra umsiting, men onki at gera uttan at fyrireika hetta arbeiðið. Tað einasta, hann hevur gjørt av øðrum, er at ferðast til Liberia og hesin arbeiðsbólkurin skuldi langt síðani verið avgreiddur.
Hann legði eisini dent á, at ES spurningurin hevur so stóran týdning fyri Sambandsflokkin, at var ES kanningin ikki við í samgonguskjalinum, hevði Sambandsflokkurin heldur ikki verið við í samgonguni.
Heðin Zachariasen sá ongan trupulleika í at lýsa ES spurningin og tí tekur hann undir.
Jákup Mikkelsen er samdur í, at ein politisk avgerð skal takast um evropapolitikkin, men tað er onki galið at kanna málið væl ov virðiliga og tað er hetta, sum samgongan ætlar.
Tómt tos
Edmund Joensen kallaði frágreiðingina hjá Jørgen Niclasen fyri tað beru undanførslur og onki uttan tómt tos.
- Hetta eru nýggjar undanførslur, tí var vilji til tað, kundi arbeiðsbólkurin langt síðani verðið settur burtur av teirri játtan, sum uttanríkisráðið hevur frammanundan og við tí arbeiðssetningi, sum longu stendur í samgonguskjalinum.
Trupulleikin er, at málið er ikki raðfest, heldur hann.
Hann fýlist á, at samgongan bara arbeiðir við EFTA málinum, men fullkomiliga gloymir ES málið.
Hann undraðist turrisliga, at landstýrið ikki skuldi klára at seta ein slíkan arbeiðsbólk upp á fimm mánaðir, tí tað er nógv longri enn tað tekur at fylla ein trolara í Barentshavinum.
Hann kom eisini við nøkrum ið kundi tulkast sum ein lítil hóttan.
- Fáa vit ikki framt tey mál, ið eru avtalað í samgonguskjalinum, fáa vit ein trupulleika.
Hann heldur eisini lítið um EFTA, tí hann kallaði EFTA fyri eina deyða sild, ella ein avtakandi mána, sum er upp á tað allar minsta.
Og Jørgen Niclasen minnir mest um skarðsmenn, tá ið teir runnu eftir mánanum, helt Edmund Joensen.
Jørgen Niclasen er ørkymlaður av, at Sambandsflokkurin gongur í tveimum, men hann letur ongan iva vera um, at hann fer at halda samgonguskjalið.
