Alt fótbóltsárið hevur tað verið tøtt kapping millum Rannvá B. Andreasen, KÍ, og Heidi Sevdal, HB, um hvør teirra skuldi verða toppskjútti í landskappingini fyri kvinnur.
Undan20. og síðsta umfari var Heidi Sevdal ovast við 28 málum, og Rannvá B. Andreasen var næstovast við 27 málum.
Í dag skoraði Rannvá B. Andreasen tvey mál í 2. hálvleiki, tá ið hon økti til 3-0 og síðani staðfesti 4-0 sigurin á B36.
Í dag skoraði Heidi Sevdal eitt mál. Fimm minuttir undan leikloki legði hon HB framum 2-1 í heimadystinum ímóti EBS/Skála. Tríggjar minuttir seinni javnaði EBS/Skála til 2-2, sum varð endaliga úrslitið.
Harvið endaðu tær báðar – Rannvá B. Andreasen, KÍ, og Heidi Sevdal, HB – ovast á tindinum við 29 málum.
Sambært faroesoccer.com var Rannvá B. Andreasen við í 19 landskappingardystum, og Heidi Sevdal var við í øllum 20 dystunum. Rannvá var á vøllinum í 1532 minuttir, og Heidi var á vøllinum í 1787 minuttir. Í miðal skoraði Heidi Sevdal 1,45 mál pr dyst, meðan Rannvá B. Andreasen skoraði 1,53 mál pr dyst.
Eingin annar enn Heidi Sevdal og Rannvá B. Andreasen vóru við í kappingini um at røkka máltindin. Íðunn Magnussen úr B36 skoraði triði flest mál. Hon skoraði 14 mál í 19 dystum ella 0,74 mál í miðal fyri hvønn dyst, sum hon spældi.
Í 2013 var Heidi Sevdal toppskjútti. Eisini í fjør skoraði hon 29 mál.
Í 2012 var Rannvá B. Andreasen toppskjútti. Tá skoraði hon 31 mál.
20. umfar
KÍ-B36 4-0 (2-0)
1-0: Annika Petersen 15.
2-0: Sigrid Jacobsen 36.
3-0: Rannvá B. Andreasen br 51.
4-0: Rannvá B. Andreasen 80.
HB-EBS/Skála 2-2 (1-1)
1-0: Milja R. Simonsen 2.
1-1: sjálvmál 37.
2-1: Heidi Sevdal 85.
2-2: Fríðrún Danielsen 88.
Reytt kort: Rakul Magnussen, EBS/Skála, 70 (2 gul)
AB-ÍF/Víkingur 1-4 (1-1)
1-0: Ásla Johannesen br 11.
1-1: Jensa Olsen 31.
1-2: Jóhanna Lervig 81.
1-3: Durita Nielsen 84.
1-4: Jóhanna Lervig 90.+3.
Endaliga støðan – eftir 20 umfør
KÍ 53
EBS/Skála 43
HB 34
ÍF/Víkingur 21
B36 17
AB 4
