Undan valinum var rættiliga stórur spenningur um, hvussu kommunusamanleggingin fór at ávirka úrslitið í summum kommunum. Ein av hesum var Horsens, sum eftir samanleggingina eisini umfatar tær báðar minnu kommunurnar Gedved og Brædstrup. Valið her var serliga spennandi, tí vanliga standa Sosialdemokratarnir sterkir í Horsens, meðan Vinstri hevur verið sterkur í hinum báðum kommununum.
Men úrslitið var, at Sosialdemokratarnir vunnu ein so ruddiligan sigur, at teir mynda meiriluta uttan hjálp frá øðrum flokkum. Tað var ikki minst høvuðsvalevninum, fyrrverandi verjuráðharranum Jan Trøjborg, fyri at takka. Sosialdemokratarnir fingu ikki minni enn 48,3 prosent av atkvøðunum og 16 av teimum 31 býráðslimunum. Vinstri fekk 11 umboð í býráðið.
