##med2##
Bíðitíðin eftir nýggjari viðgerð fyri Alzheimersjúkuna tykist draga út.
Evropeiska læknastovnurin (EMA) hevur fingið tilmæli ímóti at góðkenna heilivágin Leqembi við mótevninum lecanemab.
Hetta kann vera við til at seinka líknandi viðgerðum, metir leiðandi læknin Kristian Steen Frederiksen á Vitanarstovuni fyri Demens á Ríkissjúkrahúsinum í Keypmannahavn.
- Eg stúri, um vit nú eru komin á eitt stað eftir avgerðina, har tað kann hava drúgv útlit, áðrenn vit fáa viðgerðina til Danmarkar, sigur hann.
Ráðgevandi nevndin hjá EMA, CHMP, sum er mannað við einum hópi av óheftum serfrøðingum, metir, at ávirkanin av at brúka mótevnið lecanemab ikki vigar upp um hjáávirkanini.
Mótevnið virkar við at burturbeina proteinið beta-amyloid, sum í stóran mun savnast í heilanum hjá sjúklingum við Alzheimer. Hjáárinini eru bløðing í heilanum og hevingar í heilanum.
Við kanningum, við at brúka skanningar, eru broytingar funnar í heilanum hjá sjúklingum, men sambært Kristian Steen Frederiksen hava flestu broytingarnar ikki elvt til sjúkueyðkenni hjá sjúklingunum.
- Men bløðing í heilanum og hevingar í heilanum eru sjálvandi altíð nakað, tú skalt taka í álvara, sigur hann.
Tilmælið um at vraka rúsevnið Leqembi kom óvart á Alzheimersfelagið, sigur stjórin Mette Raun Fjordside.
- Tað eru sera nógvir Alzheimersjúklingar í øllum Evropa og í Danmark, sum eftir 20 ár uttan nýggjan góðkendan heilivág høvdu glett seg til eina skjóta góðkenning av lecanemab, sigur hon.
Heilivágurin Leqembi er góðkendur í USA, Kina, Hong Kong, Ísrael, Japan og Suðurkorea.
Ein líknandi viðgerð við mótevninum donanemab er í gongd, men vónin um, at hon verður góðkend av EMA, er ikki stór fyri yvirlæknan Kristian Steen Frederiksen.
- Eg haldi, at EMA fer at koma til somu avgerð í mun til donanemab, tí verandi úrslit fyri tey bæði mótevnini líkjast rættiliga, sigur hann.
- Men tað eru fleiri heilivágir, sum eru kannaðir og sum virka heilt øðrvísi, leggur hann aftrat.
Sambært Reuters fara heilivágsfyritøkurnar aftanfyri Leqembi, Eisai og Biogen, at søkja um at fáa áheitanina endurskoðaða.
/ritzau/
